الهه بچايو جمالي

الهه بچايو جمالي : صحافي ۽ ڪالم نويس الهبچايو جمالي 20 فيبروري 1960ع تي ڳوٺ مارواڻي جمالي، ديهه کنڀرو، تعلقي ۽ ضلعي بدين ۾ محمد سليمان جمالي جي گهر ۾ جنم ورتو. سندس تعليم ايم. اي سنڌي آهي. هن صحافت جي شروعات 1974ع کان روزاني ’هلال پاڪستان‘، ڪراچي کان ڪئي، روزاني ’ڪوشش‘، ’سنڌ‘ ۽ ’شام‘ اخبارن لاءِ باقاعده رپورٽنگ ڪئي. ان کانسواءِ روزاني ’ڪوشش‘، روزاني ’جاڳو‘، روزاني ’برسات‘، روزاني ’سنڌ‘، روزاني ’عوامي آواز‘، روزاني ’ڪاوش‘، روزاني ’خادمِ وطن‘، روزاني ’شام‘ اخبارن ۽ ماهوار رسالن ’گلن جھڙا ٻارڙا‘، ’تحريڪ‘، ’ڪاپڙي‘، پندرنهن وار ’افيئر‘ (نيوز مئگزين)، ماهوار ’پيغام احمد‘، ماهوار ’گلشن لاڙ‘ ۽ ماهوار ’پيغام لاڙ‘ ۾ سماجيات، لوڪ ادب، فنون لطيفه، سياست، عمرانيات، تاريخ، جاگرافي، زراعت، آبپاشي، ڊرينيج، ڪرنٽ افيئرز، ماحوليات، موسمياتي تبديلين، ادب، آثار قديمه ۽ ٻين انيڪ موضوعن تي ڪيترائي مضمون ۽ ڪالم لکيا، سندس ڪيتريون ئي تحقيقي رپورٽون ۽ اسٽوريون پڻ مختلف اخبارن ۽ رسالن ۾ شايع ٿيل آهن. 1970ع واري ڏهاڪي ۾ ’گلن جهڙا ٻارڙا آرگنائيزيشن‘ يونٽ ڪڍڻ جو صدر، 1976ع کان 1980ع تائين سنڌي شاگرد تحريڪ ضلعي بدين جو ڪنوينر، سنڌي ادبي سنگت شاخ ڪڍڻ جو سيڪريٽري ۽ 1991ع کان پريس ڪلب ڪڍڻ جو بانيڪار ۽ پهريون صدر ٿي رهيو. هن وقت ايوان صحافت بدين جو ميمبر آهي. سندس هڪ تحقيقي ڪتاب ”ايل بي او ڊي: هڪ مها آفت“ (2015ع) ڇپيل آهي. کيس، صحافت ۾ بهترين ڪارڪردگيءَ سبب سرواڻ سوشل ويلفيئر آرٽ سرڪل بدين طرفان ’مولوي خير محمد نظاماڻي‘ مڃتا اوارڊ (1995ع)، ڊبليو. ڊبليو. ايف (WWF) ۽ فرينڊز آف انڊس فورم طرفان پاڪستان ۾ موسمياتي تبديلين بابت شايع ٿيل ڪتاب ۽ مضمونن تي مڃتا اورڊ (2015ع) ملي چڪا آهن.

داخلا ۾ استعمال ٿيل تاريخون

1960.02.20  عيسوي

صحافي ۽ ڪالم نويس الهه بچايو جمالي 20 فيبروري 1960ع تي ڳوٺ مارواڻي جمالي، ديهه کنڀرو، تعلقي ۽ ضلعي بدين ۾ محمد سليمان جمالي جي گهر ۾ جنم ورتو.

صحافي - ڀاڱي جون ٻِيون داخلائون